1- الصيام
الصيام مش بس صيام المعدة و الجوع و العطش
الصيام الحقيقى هو صيام الجوارح كلها زى مثلا
صيام اللسان يعنى لا تؤذى حد و لا تسب حد و لا تغتاب حد ولا يبقى فيه نميمة
صيام اليد انك مثلا لا تضرب حد و لا تعتدى على حد و لا تمسك سيجارة
صيام العين انك تغض بصرك
صيام الاذن نبطل سماع الاغانى مثلا مانحبش نسمع حد بيغتاب حد و لا بيتكلم فى حاجات مش صحيحة
صيام القلب ان يكون قلوبنا متعلقة بالله اوى اكتر من الدنيا و ما فيها
بجد يا جماعة انا حسة ان موضوع الصيام دة اصعب من اى حاجة تانية بالذات صيام القلب و يا ريت نعين بعض عليه
2- الصلاة
ايه رأيكم نحافظ على الصلوات الخمس فى وقتها فى جماعة ؟؟؟؟
يعنى اول ما الاذان يأذن نقوم نصلى على طول ؟؟؟؟
و يبقى حلو اوى لو الشباب بطلوا كسل و نزلوا يصلوا فى الجامع و يكسبوا 27 درجة
و البنت صلى مع امك او اختك او جارتك اكيد هتلاقى كتير ممكن تصلى معاكم
و بكدة نكون كسبنا 27 درجة زيادة و فى رمضان يعنى الثواب مضاعف
اعتقد ان دى حاجة سهلة اوى بس ثوابها عظيم جدا
و صلاة السنة كمان سهلة اوى و فيه حديث بيقول ان اللى يصلى السنن كلها فى اليوم يبنى له بيت فى الجنة
و البيت فى الجنة احسن من اكبر و اعظم قصر فى الدنيا مش هين ابدا
3 - قيام الليل
يعنى التراويح 8 ركعات + الشفع و الوتر
ممكن تكون صعبة بالنسبة للطلبة على الاقل صلاة قيام ليل ركعتين بس
و الله مفعولها سحرى و نسبة الايمانيات بتعلى جداااااا و ثوابها رائع مش هياخد 5 دقايق يعنى
4 - القرآن
شهر رمضان معروف انه شهر القرآن
تيجوا نختم ختمة فى رمضان دة ؟؟؟؟
يعنى كل يوم جزء واحد بس
و الجزء فيه 10 ورقات ياخدوا منك نصف ساعة
و طبعا نصف ساعة مش كتير على شهر القرآن
و الحرف فى رمضان بيتحسب ب 10 حسنات
يعنى لما تقول ( الم ) كدة كسبت 30 حسنة
احسبها بقى لما تقول ( بسم الله الرحمن الرحيم )
فما بالك بجزء فى اليوم ؟؟؟؟
5 - الدعاء
طبعا مفيش حد الا و فى نفسه امنية نفسه تتحقق
بس مفيش غير ربنا اللى ممكن يحق الامنية دى ادعيه بيها ادعى بالعربية او العامية ادعى باللى فى قبلك
و ربنا قال ( ادعونى استجب لكم )
ادعى لنفسك فى الدنيا و الاخرة ادعى لاهلك ادعى للامة ادعى بكل اللى فى قلبك و كلم ربنا و هو عمره ما هيخذلك باذنه سبحانه
6 - الذكر
طبعا كلنا عملنا ذنوب كتير ياما اتكلمنا على ناس غلط و سمعنا اغانى و اخرنا صلوات وووووووووو
ممكن كل دة يتمحى بكلمتين بس ترددهم 100 مرة ( سبحان الله و بحمده ) تتغفر لك ذنوبك كلها و لو كانت مثل زبد البحر
يعنى لو مت بعد ما تقولهم ان شاء الله على الجنة
- ( سبحان الله و بحمده سبحان الله العظيم )
كلمتين خفيفتان على اللسان ثقيلتان فى الميزان حبيبتنا الى الرحمن
- الحمد لله نعم الله لا تعد و لا تحصى و لازم نكون مش جاحدين مع الله و نحمده على كل النعم اللى انعم بيها علينا
لو جبت ورقة و قلم و فضلت تكتب نعم الله عليك و الله ما هتخلص انا جربتها
موضوع الذكر دة طويل اوى و انا ان شاء الله هبقى اكتب كتير عنه فى مشاركة منفصلة
دة اللى ربنا قدر اختكم الصغيرة عليه لو حد يحب يزود باحاديث او بحاجات كمان يا ريت بجد
انا فيه كلام كتير لسة نفسى اقوله بس مش عاوزة اطول عليكم اخوتى انا كل اللى عاوزاه ناخد ثواب مع بعض
و لو قصرت فى حاجة قولولى دة موضوعكم
و لو حد فيكم دة اصلا اللى بيعمله طبيعى يخلى نيته اننا نعمل كدة مع بعض
و يا ريت اللى يشارك يوعدنى انه هيساعدنى و هيشاركنى فى الموضوع على الاقل بدعوة
و انا احبكم فى الله
موضوع: الصيام ليس على الاكل والشرب 
2007-09-16, 04:12
